A-8. TOPA JESU HONG KILAHNA PAWI

A-8. TOPA JESU HONG KILAHNA PAWI

Sungtum La:

Topa leh ukpa hong pai hi:
kumpiza, ukna leh vangliatna in
ama aa ahi hi.

Kipat Thungetna:

Pa aw,

nangmah in aksi khat lamlaksakin

na Tapa pen minam khempeuh kiangah nong kilangsak hi.

Upna khuavak tawh vantung gam na minthanna-ah kote hong sam in,
amah in tua lai-ah nang leh Kha Siangtho tawh

Pasian khat suakin nungta-in a uk tawntung hi. - Amen.

Lai Siangtho Masa:

Kamsangpa Isaiah Lai Siangtho sung pan
simna ahi hi: (Is 60, 1-6)

Jerusalem khuapi aw,

tho in la, sun nitaang bang in!

Topa' minthanna in nangmah hong taan zo hi.

Minam dangte khuamial in tuamcip ding a,
ahi zongin nangma tungah

Topa khuavak hong taang ding hi.

Ama minthanna in nang hong ompih ding hi.

Nangma khuavak sungah

minam dangte hong pai ding uh a,

nangma taankhiatna sungah kumpite hong pai ding uh hi.

Na kimkotah khuadak in la mu in.

Na mite kikaikhawmin a ciah dingin

nang kiangah hong pai uh hi.

Na tapate gamlapi panin hong ciah ding uh a,
naungek bangin na tanute hong kipua ding hi.
Tua ciangin nangmah in mu in na maitaii dinga,
na lungsim liingin lungdam ding hi:

bang hang hiam cih leh

tuipi tungtawnin nangma kiangah
van hong kipuak ding a,

minamte' hauhna khempeuh
nangmah kiangah hong tung ding hi.

Midian mite leh Ephah mite' kalaoh-note,
kalaoh honpite in nang hong tuam ding uh a,

Sheba gam sunga a om khempeuh hong pai ding uh hi.
Amaute in kham leh paknamtui hong paipih ding uh a,
Topa phatna a tangko ding uh hi.

Hih in Pasian' Kammal ahi hi.

Salan La Kidawnna: (La. 72, 1-2. 7-8. 10-13)

1. Pasian aw, nangma thutang
kumpipa hilh in la,

nangma thuman kumpipa' tapa hilh in,
amah in thumanna tawh na mite tungah
thukhen hen la, mi zawngte tungah
thutang tawh thu khen ta hen.

Dawng tawina :

Topa aw, minam khempeuh na
mai-ah hong bok ding uh hi.

2)       Ama hun sungin thuman pung hen la,

khapi a bei mateng nopna ngah ta hen.
Ama ukna tuipi khat pan tuipi khat,
gunpi panin leimong dongin

om tawntung ta hen. (D)

3. Tarshish kumpite leh tuikulh neu-a kumpite in
ama tungah siah pia uh hen la,

Sheba leh Seba kumpite in letsong puak ta uh hen.
Kumpi khempeuh ama mai-ah bok uh hen la,
minam khempeuh in ama na sern ta uh hen. (D.)

4.  Bang hang hiam cih leh

mi cimawh mi-in a koh ciangin
amah in honkhia a,

a zawng, huh ding a nei lo mite a honkhia hi.
A thakiam mi leh a cimawh mite

amah in hehpih a,

mi cimawhte' nuntakna a hon hi. (D.)

Lai Siangtho Masa:

Ephesus thuzuite tunga Paul' laikhak sung pan
simna ahi hi: (Eph. 3, 2-3. 5-6)

Note' phattuamna dingin Pasian in hong hehpihna tawh
hih nasep a sem dingin

a'hong sawlna thu na thei uh hi.
Lai ka hong khaksate sungah

a tomno-in kong gensa bangin
Pasian in ama thusim kei tungah
hong hilh khin zo hi.

A beisa hun-ah tua thusim pen
kuama tungah kigen lo a,

ahi zongin tu-in Pasian in a siangtho a sawltakte leh

a kamsangte tungah Kha Siangtho a hilhsak hi.

Tua thusim in:

Lungdamna thu a kihilhna hangin
Gentail mite in Judah mite tawh
Pasian' thupha ngah khawm thei a,
amaute tawh pawl khat suakin,
Pasian in piak ding a kiciam thute,

Christu hangin a ngah khop theihna uh ahi hi.

Hih in Pasian' Kammal ahi hi.

Alleluia: (Mt. 2, 2)
Alleluia, alleluia!

Nisuahna lam pan ama aksi hong suah ciangin
ka mu uh a, amah a bia dingin a

hong pai ka hi uh hi,

Alleluia!

Lungdamna Lai Siangtho:

Matthew gelh Lungdamna Lai Siangtho sung pan
simna ahi hi: . (MI. 2, 1-12)

Herod in Judea gamah kumpi

a sep hun lai takin

tua gam sung Bethlehem khua-ah
Jesu asuakhi.

A suah khit phetin aksi thu lamsang

a siam mi pawl khat, nisuahna lam panin
Jerusalem khua-ah hong tung uh a,
"Judah mite' kumpi ding ahi,

naungek a hong suak pen koi lai-ah

om ahi hiarn? Nisuahna lam pan ama aksi
hong suah ciangin ka mu uh a,

amah a bia dingin a hong pai ka hi uh hi," hong ci uh hi.
Kumpi Herod in hih thu a zak ciangin lamdang a sa mahmah a,
Jerusalem khua mi khempeuh in zong lamdang a sa ciat uh hi.

Tua ahih manin Herod in siampiliante leh

Thukham hilh siate khempeuh kaikhawm a,

"Koi lai-ah Christu suak ding ahi hiam?"
ci-in a dong hi.

Amaute in, "Kamsangpa in alai gelhna sungah,
'Judah gam-a om nang Bethlehem khua aw,

ka mi Israelte a uk dingin nangma sung panin ukpa khat
hong piang ding ahih main

Judah gam a uk khuate lakah a neu na hi het kei hi,'
ci ahih manin

Judaea gam sung Bethlehem khua-ah suak ding hi,"
ci-in a dawng uh hi.

Tuaahih ciangin Herod in tua mipilte sam sim a,
aksi a kilat hun tel takin a dot khit ciangin,
Bethlehem khua-ah a paina dingun sawl a,

"Tua naungek lim takin va zong un la,

kei zong hong pai-in amah ka biak theihna dingin,
na muh khit uh ciangin .
kei kiangah thu hong zasakkik un,"

ci-in a vaikhak hi.

Amaute in kurnpipa' vaikhakna thu teng
a zak khit uh ciangin paikhia uh a,
nisuahna lamah a muh uh aksi mah,

lam a pai lai takin a mu uh a,

naungek omna tung san tak a tun matengin
amaute' mai-ah tua aksi a na pai hi.

Tua aksi a muh uh ciangin

a lungdamna uh kigen thei lo hi.
Inn sungah amaute a lut uh a,
naungek leh a nu Maria a mu uh hi.

Amaute khukdinin tua naungek a biak khit uh, ciangin,
a van puakte uh suahkhia uh a,

kham, saledi paknamtui leh mirrah paknamtuite
letsong in a pia uh hi.

Herod kiangah a kihilkik lohna dingun,

a mang sung uh-ah Pasian in hilh ahih manin,
lampi dang tawnin a gam uh-ah a ciahkik uh hi.

Hih in Topa' Lungdamna Lai Siangtho ahi hi.

HILHCIANNA:

Thuhilh siapa Theih ding:

Kum thum sung tawntung tu ni a kisim Lai Siangthote kibang khin ahih manin B Kum leh
C Kum a hilhciannate zong hoih na sak zawk leh na zang thei ding hi.

Kong it thuzui ute naute aw,

Tu ni a i bawl pawi in Paska pawi leh Pentecost pawi zomin a upa
penpen pawi ahi hi. Lungdambawl, Jesu' suahna pawi a kibawl ma
pekin hih pawi na kibawl khin hi. Hih ni in thu tampi tak kiphawkin,
tuate lakah Jesu' suahna zong kiphawk ahih manin kum. tampi
sung hih pawi ni pen Jesu suah Lungdambawl pawi taangin na
kizang hi.

- Tu ni a i bawl Pawi pen Greek kam tawh "Epiphany'" kici a, a

khiatna in "kilahna" cihna ahi hi. A kithei nai lo  na khat, ahih kei leh
mi khat hong kilahna ahi hi.

Eite adingin a kithei nai lo hong kilangpa pen i Topa Jesu ahi hi.
Tapa Jesu hong kilahna pawi ni-in hih thu i phawk ding hi : Christu in
amah pen eite Hong Gumpa leh Pasian' Tapa ahihna thu hong lak
ahih manin Pasian i phat ding hi.

Hih pawi ni-in thuzui masate in Jesu hong kilahna a tuamtuamte a
phawk uh hi:

v  hih leitungah hong kilah masakna ahi, Bethlehem khua-ah hong
suahna.

v  rni pil thumte kiangah hong kilahna.

v  mihonpite tungah hong kilahna, Jordan gunah John in a
tuiphum ciangin Pa Pasian in mihonpite kiangah awging tawh
honglahna.

v  a nungzuite kiangah hong kilahna; tua pen Cana khua mo

pawi-ah tui pen leenggahzu hong suaksak hi.

Hih thupiang tuamtuamte tungtawnin Jesu in amah a mute tungah
amah pen ni dang lai a kamsangte genkholh Messiah Topa ahihna thu
hong lak hi.

- Jesu hong suahna pawi December kha ni 25 ni-in hong kibawl

ciangin tu ni-in mi pil thumte kiangah Jesu hong kilahna thubulphuh

in kinei hi.

Thuzui masate in tu ni penlawpna lianpi -tawh na bawl uh hi. A
lawpna ding uh thu khat om mah hi: Mi pil thumte pen Judah mi a
hilo mite lakah Christu a um masa pen ahi hi uh hi.

/

Thuzui masate in ni dangin a tam zawte lawki milim biate na hi ngei
uh hi. Tua ahih manin mi pil thumte pen amau mah bang ahi ngei
dingin ngaihsun uh hi. Amaute in Pasian sungah upna a nei dingin

Judah mite bek hi loin lawki ahi, amaute nangawn Pasian in a sap

manin a lung uh dam pha mahmahin ama tungah lungdam thuk
niloh uh hi.

Eite zong Judah mite ihi kei hi: eite ihi a, i pute i pate ahi zongin
dawi biate ihi ngei hi. Eite in Christian nu leh pa sung panin suakin, i
suah khit limin tuisawpna a ngah mite ihi a, i liat khit teh Christian
thuzui suakin tuisawpna a ngah mite ihi zongin upna a nei dingin
hong sapna leh eite kiangah amahmah hong kilahna hangin tu ni pawi
ni-in Christu Topa i phat ding a kilawm mahmah ahi hi.

Tua ahih man in hih Topa Jesu hong kilahna pawi pen "I upna pawi"
ci lehang kituak thei pen ding hi.

1.    "Christu sungah Upna ka nei hi," i cih ciangin bang khiatna nei
ahi hiam?

- Mi pawl khat in a gen ciangin "Jesu Christu ka um hi" i cih ciangin

"Jesu Christu hong hilh thute pen man hi, ci-in ka sanna ahi hi," ci

uh hi.

Christu sunga upna un tua bang liliai bek hi peuhmah loin tampi tak
huam lai hi:

a)    Christu sungah upna ka nei hi, i cih ciangin Christu in eite'
Pasian leh Hong Gumpa hi, ci-in sangin amah bekin eite hong
gum thei hi, ci-in kip takin upna ahi hi. Ama vangliatna leh ama
hong itna kip takin muanna ahi hi.

b)   Tua bek hi nai lo lai-in, Christu ka urn hi, i cih ciangin Christu
kiangah kipumapna, ama hong itna, muangin ama deihna a
tawntungin a sern dingin kiginkholh tawntungna ahi hi.

Hih in nuntakna kikhelna ahi hi; mawhna nusia-in Kha Siangtho
sungah nuntakna thak tawh nuntakna ahi hi. Eima ading bek
phattuama i zonna panin kikhelin itna tawh mi dangte
phattuamna ding bawlna ahi hi.

- Tu ni Lungdamna Lai Siangtho sungah i sim mah bangin mi pil
thumte in Herod thupiakna mah bangin Jerusalem khua tawnin ciah
loin lam dang tawnin a ciah uh hi, ci-in i sim hi.

Amaute in lam dang tawnin a ciah bek uh hi loin inn a tun uh ciangin
a nuntakdan uh zong hong kidamdang hi. Tuucingte tung a hong
piang nate pen amau tungah zong hong piang hi. Amaute in a nasep
lui mah uh sem uh a, ahi zongin a mawhna luite uh bawl nawn lo
uh hi.

- Kigingkhollopi-a tuisawpna a ngah mite adingin a lauhuai mahmah

na khat om hi. Hih bang mite in Christian thuzui suahna in ni danga

a zuih ngei uh thukhamte khelin a dang thukhamte zuihna leh biakna
paizia khelna bang lellelin ngaihsun uh a, dau ngaihsut lua liang uh
hi. Tua pen hilo hi; Christu upna in kikhelna cihna hi a, nuntakna
thak tawh nuntak kipatna cihna ahi hi.

Christu ka um hi, i cih ciangin Christu pen i nuntakna sungah
"lampi, thuman thutak leh nuntakna" ihihsakna ahi hi. (In. 14, 6)'

2.    Upna letsong in a lam dang mahmah letsong ahi hi:

Hih in bang khiatna a nei hiam? Bang a cih nopna ahi hiam? Tu ni
Lai Siangtho nihna sungah Paul in lawki suahna panin Pasian sungah
upna i neihna dingin sapna i ngahna in kuama lamet ngam loh
hehpihna ahi hi, ci-in Ephesus thuzuite tungah gen hi. Judah
mite in ahih leh Messiah hong pai ciangin amaute bek gumkhia ding
a, minam dang khempeuhte in gupna ngah peuhmah lo ding hi, ci-in
khauh takin a um uh hi. Ahi zongin Christu a sang mite pen
lawkite vive hi zawin Judah mite a tam zawin in amah nial uh
hi. Paul in hih pen mihingte theih zawh loh thu thuk ahi hi, ci
hi. (Eph. 3, 4-6)

- Eite in upna i ngahna zong hih bang mah ahi hi, i ci thei ding hi. Paul
zong ama tangthu a ngaihsut ciangin lamdang kisa hi: bang hangin
amah, Pawlpi a bawlsia penpenpa in Christu a urn dingin Pasian in
sam a, ama sangin nakpi takin a siangtho zaw, a gamtat hoih
zaw mite in Christu sungah upna nei 10 uh a, Pasian in sam 10
ahihiam?

Eite khat ciat in zong hih bangin i gen thei hi. Bang hangin Christu
in amah a um dingin kei keekkeek hong sam a, amah ka san theihna
dingin hong huh a, kei sangin a kilawm zaw, a siangtho zaw leh a
hoih zaw mite tu ciang dongin Pawlpi sungah zong hong lut nai lo uh
ahi hiam? (Eimau innkuan sung mahmahah zong Pawlpi sung a hong

lut nai lo i sanggamte om lai kha ding hi.)                    ,

Paul in hih thudotna hih bangin hong dawng hi:

"Note' upna hangin Pasian' hehpihna tawh
hotkhiatna a ngah na hi uh hi.

Note' thalawhna hangin a ngah hi loin
Pasian hong piak khong ahi hi." (Eph. 2, 8)

Bang hangin kei keekkeek hong sam na hi hiam, ci-in Pasian kiangah
kuai liangin i dot sangin Christu a um dingin nong sap manin ka lung

a dam hi, Topa aw, ci-in lungdam i thuh zawk ding thupi hi.

Upna in eite' nuntakna adingin Khuavak ahi hi:

- Tu ni Lai Siangtho masa sungah Isaiah in Jerusalem khuapi in ni

taang tawh a kisawp siangtho sinsen bangin hong gen a, tua khuapi

pen siangtho lua, taang lua ahih manin leitung gam khempeuh a om

minam khernpeuh huup hi, ci-in hong gen hi. Minam tuamtuamte

Jerusalem zuanin hong pai uh a, Pasian adingin hong puak uh

letsong hoih pente hong ap uh ciangin amaute mahmah zong

khuavakin tuamcipin silsiang hi. Tua hun lai takin Jerusalem khuapi

lobuang mun khernpeuh khuazingin a tuamcip hi.

Jesu hong gupna ding lamenin ama kiang i zuat ciangin eite tungah
zong hih bang lim hong piang hi. Eite leh i kim i pam a om leitung
khempeuh in mawhna khuazing sungah kidiahcip hi. Ahi zongin
Christu zuanin upna tawh amah i san ciangin eite lungsim sungah
khuavak hong taangin eite mahmah zong Christu' khuavak a
taangsak meivakte i suak hi.

Hih thu pen Paul in Ephesus Christian thuzuite tungah hih bangin
genhi:

"Note pen khuamial sungah a om ngei hi napi-in
Topa' mi na suah khit uh ciangin khuavak sungah

a om hita na hih uh manin khuavak sungah a om mite
bangin na gamta un." (Eph. 5,8)

Pasian in eite tungah hih zah takin hong hoih ahih ciangin eite zong
ei lam panin sep leh bawl ding tavuan i nei hi, ci-in Paul in hong

   gen hi:           ..

"Bang hang hiam cih leh khuavak sung a omna in

a hoih, a man, a thutak hong piangsak hi." (Eph. 5,9)

Christu sung a upna in bang hiam cih pen Peter in Pasian' Kammal
in bang ahi hiam, ci-a a gen tawh a bang ahi hi. Upna zong hih bang
mah ahi hi:

"Note'lungsim sungah zingsol hong suakin
khua a hongvak matengin khuamial lak a
mei taang bangin hih thute ngaihsun le uhcin
hoih mahman ding hi." (2 Pet. 1, 19)

Hih leitung khua mial gam sungah i paina dingin Christu sunga i
upna in khuavak hong pia hi. I sih ciangin amah in zingsol bangin
eite kiangah hong pai-in tawntung nuntakna hong lak ding hi.
Christian thuzui khat adingin sihna in zingsang tuung tawh kibang a,
a bei ngei lo ding ni taang kipatna ahi hi.

4.    Christu sunga upna in i nuntakna sungah lungnopna hong kipatna
ahi hi:

- Mi pilte in Herod nusia-in Bethlehem khua paina lam a zuih kipat

uh ciangin bang hong piang ahi hiam, cih Lai Siangtho in hih bangin

hong gen hi: aksi hong kilangkikin, "tua aksi a muh uh ciangin a

lungdamna uh kigen thei lo hi," ci hi. (Mt. 2, 11). Aksi bek a muhna

uh tawh hih zah takin nuam ahih leh upna hangin amaute a Gumpa

hi, ci-a a theih uh Jesu a muh uh ciangin bangzah takin lungdam

kaan ding ahi uh hiam?

- Eite in Jesu i san ciangin zong hih bangin lungnopna i ngah hi: i

lungsim sungah leitung mite hong piak theih loh, Kha Siangtho bekin

hong piak theih, a lamdang mahmah lungnopna i ngah hi.

Ei leh ei hih bangin i kidong thei ding hi: tuisawpna i ngah lai taka i
neih lungnopna koi lai tung ta ahi hiam? Christu i theihna a khan
mah bangin amah i itna zong khang semsemin i lungnopna zong
khang semsem ahi hiam? Ahih kei leh tua i lungnopna mangthan1g
khin ahi hiam? Tu ni-in tuisawpna i ngah tuung a i neih lungnopna i
ngah kei leh i lungsim sungah khuazing tungsakkik ihih man hilo
ding ahi hiam? Mawhna i bawl ciangin Kha Siangtho a hawlkhia ihi
a, i kha sungah Kha Siangtho hong om kei leh i lungsim sungah
lungnopna leh khuavakna zong hong om thei lo ding hi. Khuavakna
leh Lungnopna pen Kha Siangtho kiang panin i ngah hi a, amaute a
kipawl khin ahi uh hi.

5.    Eite sungah Christu sunga i upna pen a khantoh tawntung ding
kisam hi:

- Mi pawl khat in upna pen puansilh bangin genteh uh a, kisuahkhia

thei, a kisilh thei, deih bangbangin a kilakik thei bangin ngaihsun uh

hi. Upna in tua bang hi peuhmah lo hi. I upna pen a khan semsem

kei leh ama thu in a kiam semsem ding ahi a, a tawpna-ah a bei ding

ahi lel hi.

Eite in Christu pen ni simin lungsim takpi tawh i sang ding a, ama
deihna a kicing zaw leh a hoih zaw semsemin i zui ding a, amah i
muang semsem ding hi. Paul in hih thu tawh kisai-in Ephesus
thuzuite kiangah hih bangin lai a na khak hi:

"Notelungsim a thahatna dingin

Pasian in a kicing ama vangliatna sung pan in
a Kha Siangtho tawn note hong thakhauhsakin
na upna hangun note lungsim sungah Christu
hong tengin, itna thu-ab zung thuk khakin

bul kip na neihna dingun thu ka ngen hi." (Eph. 3, 16-17)

Christu sunga upna in mi pilte sung, nungzuipite sung leh ama nu
Maria sungah khang semsem hi. Amaute in Pasian' itna sungah
kipumpiak uh a, Pasian in amaute adingin a geelsaknate ahih theih
bangbangun sem uh hi: Eite zong tua bangmah in i sem ding hi.
Upna in nuntakna mah tawh kibang hi; a khan toh kei leh a si hi lei
hi. I sanggamte pawl khat in ni dang a a upna uh nei nawn
loin biakinn zong hong kai nawn lo uh hi. Bang hang hiam cih 1eh
a upna uh a khanna dingun bangmah peuhmah sem loin,
hanciamna nei lo uh hi. Tu-in ahih 1eh amaute sungah khuazing hong
tungkik ta hi.

6.    Christu sungah i upna a khan theihna dingin mi dangte kiangah i
tangkona kaanin a hoih zaw lampi om lo hi:

- Mi pilte in zong a ciah uh ciangin a muh thute uh imcip peuhmah lo

ding hi. A kimuhpih a kithuahpih mi khempeuh kiangah Christua

muhna uh thu gengen ding uh hi.

Tuucingte zong tua bangmah ahi uh hi. Bangmah a thei 10 mite ahih
uh hangin, "van tung mi in amautekiangah hih naungek tawh kisai thu
a gente a· gen sawn ub hi," ci-in Lungdamna Lai Siangtho in hong
gen hi.

Jesu dam lai mahmahin zong ama thupha a sang kha mite in genkhia
loin om thei lo uh hi. Jesu in amaute in kuamah a gen lohna dingin
kham zel napi, kham zo loin tangko gawp uh hi. Jesu' vangliatna leh
a hoihna, a na lam dang bawlnate pen ngah kha sang kha uh ahih
manin genkhia nuamin tangko nuam uh hi.

- Eite zong tua bangmah ihih theih ding kisam hi. Mi pilte Jesu a lak

aksi mah bangin eite zong mi dangte J esu kiangah a paina dingun

lam a lak mite ihih theihna dingin hanciam ni. Eite in leitung

buppi-ah Christu a tangkote ihih theihna dingin, ama thu i gamtatna

tawh i zui ding a, i kam mahmah tawh zong i gen ding hi. Bang

hangin eite Christian thuzui suak ihi hiam ci-in i kidot ciangin, mi

khat in hong gen a, a suak ka hi hi, i ci ciat ding hi. Ei zong mi dang

khat in Jesu kiangah amah a urn dingin hong puak mah bangin eite

in zong mi dangte Jesu kiangah i paipih ding i tavuan, i nasep

thupi pen pen ahi hi.     -

- Eite in mi dangte kiangah Christu thu i tangko ciangin leh Christu
kiangah mite i paipih ciangin mi khat bek hi loin a honhonin i paipih
zawhna dingin i hanciam lai ding hi. I kim i pam-ah thuzui nai lo mi
tampi a om lai leh i Pawlpi mahmah in Christu hong itna, ama hong
piak lungnopna leh khuavak pen mi dangte a huup zo zah dongin

lakkhia zo nai lo hi hang, cih i kithei ding a, i sep ding i kipat kul hi,
cih i thei ding hi.

Thukhupna:

1.     Tu ni Jesu hong kilah pawi ni-in Pasian in a Tapa eite
kiangah hong lah manin nakpi takin amah i phat ding hi. Amah
in eite pen upna tawh ama kiangah hong sap manin zong i lung a

dam hi.

2.     Christu sung a upna i cih in amah in eite hong gupna dingin
vangliatna nei-in hong it ahih manin ama tungah muanna lianpi i
neihna ahi hi. Tua bek hi loin Christu ka um hi, i cih
ciangin ama kiangah kipumpiak vilvelin, mawhna khempeuh
nialin Kha Siangtho lamlahna bangin Christu' deihna i

zuihna ahi hi.

3.     Jesu Christu sungah i upna in a manpha penpen letsong hi a, a
lamdang mahmah a thuk mahmah letsong zong ahi hi. Pasian in
eite hong it manin Jesu Christu i san theihna dingin hong sam hi.
Hih sapna i ngah theihna dingin bangmah peuhmah kilawmna i

nei kei hi.

4.     Upna in i nuntak sung lam hong lak khuavak ahi hi; eite in
upna khuavak i ngah khit ciangin khuazingin hong ukcipkik
lohna dingin i nuntakna mahmah khuavak i suaksak ding hi.

5.     Christu sungah upna i neihna in i nuntak sungin lungnopna a
hong pia thci penpen ahi hi. I upna a man taktakahi hiam cih i
kitheihna dingin i lungsim tawng taktakah lungnopna i neih leh i
neih lohna panin i theikhia ding hi. Lungnopna man taktak i neih
leh i upna a nungta hi a, a man upna a nei ihi hi, cih i kithei thei

ding hi.

6.     Ni simin upna lamah i khantoh kul hi; Upna in a nungta hi a, a
nungta na khat peuh a khantoh loh ciangin a si ahi lel hi. Christu
sungah upna zong i khansak kei leh a si ding ahi hi.

7.     Leitung nate pen mite kiangah na hop, na piak ciangin tawm na
nei semsem a, na neihsunsun mi na piakpiak leh a sawt loin hong
bei-in nang ading hong om nawn lo ding hi. Upna thu tawh
kisai-in tua bang hilo hi; kilehbulh linlian hi. Na upna na
khansak nop leh na upna mi dangte na hop kul hi; na upna thu
na genkhiat ciangin na upna hong khang tektek hi. Mi tampi
J esu kiang a tunna dingin lam a lak aksite ihih theihna dingin
Pasian in nang leh kei hong deih hi. Christian nuntakna

siangtho takin i zuihna tawh Christu a lak mite ihih ding
kisam hi. Ei nuntakna hong mute in Christu mu ding uh hi.

Tua bangin Jesu hong kilahna pawi in khiatna nih nei hi: Pasian in
eite kiangah a Tapa hong lah man in amah i phat a, eite in Jesu mi
dangte kiangah i lah theihna dingin thu i ngen hi.

Jesu Christu tungan phatna om ta hen.

Mipi' Thungetna:

Makaipa:

"Khuazing sung panin khuavak sungah hong sam" i Pa Pasian kiangah thungen
ciat ni: (1 Pet. 2, 9):

1. A lian bel Siampipa, i Siadawpa, phungyite, nungak siangtho, tangval
siangthote leh thuhilh siate in a siangtho rnahmah nuntakna tawh nungta-in
amau' uk sung mite Christu kiangah a paipih, lam a lak khuavak a suah
theihna dingun, Topa tungah thungen ciat hi:

Mipi: Topa aw, ka thungetna uh hong ngai tan.

2.  Ei khua sung thuzuite in khat leh khat i ki-itna tawh i kim i pam a om thuzui
nai lote tungah Christu a tangko ihih theihna ding leh i ki-itna tawh amaute'
lungsim i zawh theihna dingin, Topa tungah thungen ciat ni:

Mipi: Topa aw, ka thungetna uh hong ngai tan.

3.  Eite khat ciat in i nuntak hun sung khempeuh in Christian i suahna hangin i
lungnopna a khan theih semsemna dingin i upna zong a khan theih
semsemna dingin, Topa tungah thungen ciat ni:

Mipi: Topa aw, ka thungetna uh hong ngai tan.

4.  Tuisawpna a ngah hun lai taka a ngah uh lungnopna a mansuah Christian
thuzuite in mawhna lampi nusia-in, Christu in amaute khuavak piakikin
lungnopna a ngahkik theihna dingun, Topa tungah thungen ciat ni:

Mipi: Topa aw, ka thungetna uh hong ngai tan.

5.  Mi khempeuhte in amaute kiangah a kilak nuam Jesu a muh khiat theihna
ding uh leh upna tawh amah a san theihna dingun, Topa tungah thungen
ciat ni:

Mipi: Topa aw, ka thungetna uh hong ngai tan.

Pa aw, na Tapa kote kiangah nong lah theih manin lungdamin nangmah kong
phat uh hi; ama sungah upna nei-in amah ka san, theihna dingun zong nong huh
hi. Ka upna uh a khan theihna ding leh ka lungdamna uh a kicin theihna dingin
mi dangte zong Jesu kiangah ka tunsak theihna dingun hong huh ta in, ci-in

kote' Topa Christu suangin kong ngen uh hi. - Amen.

Letsong Vanpiakte Tungah Thungetna:

Pa aw,

na Pawlpi hong piak letsongte
hong sang in;

Siangtho Pumpi biakpiakna sungah

kham, paknamtui leh mirrahte kong ap kei uh a,
ahi zongin tuate a sangpa kote' Topa Jesu Christu
mahmah kong ap uh hi:

amah in nang tawh a tawntungin
nungta-in a uk hi. - Amen.

Pa Pasian Phatna La:

Pa aw, nangmah in vangliatna
khempeuh rawh a kicing

a nungta tawntung Pasian na hi a,

kote' Topa Jesu Christu suangin a tawntungin
mun khemp'euhah lungdam kong thuh ding uh
a kilawm mahmah ahi hi.

Amah in mi khempeuhte' khuavak hi a,

mihing bangin kote kiangah hong kilah ciangin

kote hong gum ding a na vaihawmna ka thei uh hi.

Amah in a si thei lo ama lim leh a meel

suun dingin ka khate uh hong nungtasakin,

a vangliatna hong lak hi.

Vantung mite leh mi siangthote

tawh kipawl khawmin

a tawp ngei lo phatna la sa-in nang kong phat uh hi:

Vanglian Topa Pasion in siangtho hi, siangtho hi, siangtho hi.....

Siangtho Pumpi La:

Nisuahna lam panin ama aksi ka mu zo uh a,
Topa bia dingin letsongte tawh kong pai uh hi.

Siangtho Pumpi San Khit Thungetna:

Pa aw,

na khuavak tawh lam hong lak in.
ni simin nuntakna sungah Christu

ka muh theihna ding uh leh itna tawh

ka san theihna dingun hong huh ta in;
Amah in a tawntungin Topa ahi hi. - Amen.