A-3. ADVENTU NIPI THUMNA

A-3. ADVENTU NIPI THUMNA

Sungtum La:

Topa tungah lungdam tawntung un;
khat vei kong cihkikin-ah: lungdam un;
Topa hong nai zo hi.

Kipat Thungetna:

Christu hong pai ciangin lungdamna tawlt i kidim
theihna dingin Pasian tungab thungen ciat ni:

Vantung a om Pa aw,

ko nangma mite in Christu' suah ni
lamenin ka ngak uh hi:

gupkhiatna ka ngah manun ka lungdam theihna ding
uh leh itna leh lungdamna tawh ama hong suahna
Lungdambawl pawi ka bawl theihna dingun

hong huh ta in.

Amah in nang leh Kha Siangtho tawh Pasian khat
suakin a tawntungin nungta-in a uk hi. - Amen.

Lai Siangtho Masa :

Kamsangpa Isaiah Lai Siangtho sung panin

simna ahi hi: (Is. 35, 1-6. 10) .

Gamlak leh lei keuna gam lungdam ding a,

sehnel gam lungdamin palhkhia ding hi.

Unok pak bangin tampi takin palhkhia ding a,

lung nopna leh lasakna tawh lungdam ding hi.

Lebanon mual a minthanna Carmel mualleh Sharon
mual a min liatna ama tungah kipia ding hi.

Amaute in Topa' minthanna

i Pasian' liatna mu ding uh hi.

A zaw khutte khauhsak un la,
a no khukte kipsak un.

Lungsim lauthawng mite kiangah,
"Thakhauh un, lau kei un!

En un, na galte uh tungah phu hong laksak dingin
Pasian hong pai ding a, amah in note hong
honkhia ding hi," ci-in.

Tua ciangin mittawte' mit kihong ding a,
bilgongte' bil kihong ding hi.

Tua ciangin khebai mipa diangin lamding a,

a pau thei lo mipa lungdamin la sa ding hi.
Bang hang hiam cih leh gamlak-ah tui hong
phul ding a, sehnel gam sungah lui tui

hong luang ding hi.

Topa' hotkhiatsa mite hong ciahkikin
lungdam tawntungna mai pua-in la sa kawmin
Jerusalem-ah hong tung ding uh hi.

Amaute in lungdamna leh kipakna ngah ding uh a,
dahna leh khuisatna om nawn lo ding hi.

Hih in Pasian' Kammal ahi hi.

Salan La Kidawnna: (La. 146, 7-10)

1.                 A kinengniam mite adingin
 thumanna semkhia a,
gilkialte an yak hi.

Topa in thongkiate a khahkhia hi.

Dawng tawina :

Topa aw, hong pai in la, hong gum in.

2.  Topa in mittawte khua musak hi.

Topa in niamsakna a thuak mite sang tosak a,
Topa in thuman mite a it hi.

Topa in peemtate kern a, meigong nurneite leh
pa nei lote a huh hi. (D.)

3. Ahih hangin amah in

mi gilote' vaihawmna suksiatsak hi.
Zion aw, nangma Pasian Topa in
Khang tawntungin uk ding hi.
Topa phat un! (D.)

Lai Siangtho Nihna:

James' laikhak sung panin simna ahi hi: (Ja. 5, 7-10)
Pasian in note hong kern ding ahih manin

na lungkhamnate khempeuh uh ama kiang tunpih un.
Note pilvangin khua phawk un.

Na gal uh ahi Dawi mangpa,

hurnpi nelkai bangin

a nek theih ding zongin yak kawikawi hi.
Leitungah thu urn dang khempeuh in zong

note thuak mah bang a thuak ahihna thu thei un la,
na upna uh-ah kipin Dawi mangpa na nial un.

Tawl khat na thuak khit uh ciangin
Christu tawh na kipawlna hangun
tawntung minthanna a ngah dingin

note a hong sam, hehpihna kicingin a nei
Pasian in note a cingtaakin hong bawl ding a,
kipna, thahatna, bulkip kician hong pia ding hi.

Hih in Pasian' Kammal ahi hi.

· Alleluia: (Lk. 4, 18)
Alleluia, alleluia!

Gimna a thuak mite tungah Lungdamna Thu a hilh dingin
Topa in kei hong seh khin ahih manin ka sungah

Topa' Kha Siangtho hong om hi.

Alleluia!

Lungdamna Lai Siangtho:

Matthew gelh Lungdamna Lai Siangtho sung pan
simna ahi hi: (MI.11, 2-11)

Tuiphumpa John in thong sung panin

Jesu' nasepnate a zak ciangin Jesu kiangah

a nungzuite sawl.a, "Nang pen a hong pai
dingpa na hi hiam, tua ahih kei leh a dang

na lamen lai ding ka hi uh hiam?" ci-in a dongsak hi.

Jesu in amaute kiangah, "Va ciahkik un la,

tu-a na zakte uh leh na muh uh thute va gen un :

Mittawte in khua mukik a, khebaite pai theikikin
mi phakte damkik a, bilngongte in khua zakikin
mi site hingkik a, mi zawngte tungah
Lungdamna Thu a kihilhnate va gen un.

Kei hong umte pen a lungdarnhuai

mahmah ahi hi," ci-in a dawng hi.

Tua thu dong mite a ciah khiat khit ciangin
Jesu in mihonte kiangah John' thu gen a,
"Gam lakah John kiangah na pai uh ciangin
bang a mu dingin kilamen na hi uh hiarn?

Huih in a mut awn diamdiam lopa kungte a en ding maw?
Tua hilo ahih leh bang a mu dingin

kilamen na hi uh hiam?

Puan hoihnono a silhpa a mu dingin kilamen maw?
Ataktakin ci lehang puan hoihnono a

silhte pen kumpi inn sungah om uh hi.

Tua ahih leh bang a en dingin a pai na hi uh hiam?

Kamsangpa a en ding maw?

Hi hi, kamsangpa a en dingin na pai uh a,
tua na rnuhpa uh kamsang mawkrnawk ciang

bek hi loin a lian zaw khat ahi.hi.

Bang hang hiam cih leh Lai Siangtho in
John' thu a genna-ah,

'Na paina ding lampi a hong khol dingin
nangma mai-ah ka kamtaipa ka sawl hi,'
ci-in Pasian in gen hi, ci-in kigelh hi .

Leitung mi khempeuh sung pan
Tuiphumpa John a lian pen ahi hi.

Ahi zongin vantung ki-ukna sungah

a neu pen i cihte nangawn

John sangin lian zaw lai hi.

Hih in Topa' Lungdamna Lai Siangtho ahi hi.

HILHCIANNA:

Kong it thuzui ute naute aw,

- Nung Nipini-in Messiah in kilemna hong puak sawltakpa hi a, Isaiah
hong gen mah bangin tua kilemna in mihingte tung a hong piak
letsong hi, ci-in i za zo hi.

Isaiah mah in tu ni-in hong gen mah bangin Messiah in letsong dang
khat hong puak ding a, tua letsongin lungnopna ahi hi.

Jesu suah Lungdamna pawi hong nai tektek ahih manin Pawlpi in
Christian nuntakna sungah a kisam a thupi mahmah ahi, Christian
lungnopna i ngah theihna dingin hong hanthawn hi.

- Leitungah naungek a kipan puteek dongin lungnopna bekbek
     lunggulh a, hih lungnopna pen mihingte in a tawntungin i zong hi.

Leitung ah i nuntak lai-in lungnopna taktak i mu thei ding hiam?

Mi pawl khat in lungnopna pen i liim tawh kibang hi, ci uh hi. I liim /
pen i khut tawh mat sawm lehang kal khat ta na ma pai hi. Pawl khat
in lungnopna pen i mang tawh kibang hi, ci leu leu uh hi; ihmu i
khanlawh ciangin bei hi.

Ahi zongin Pawlpi in tu ni-in hih bangin hong hilh hi:

Messiah in mihingte tungah a man taktak lungnopna hong pia hi; mi
tampite in hih lungnopna a ngah kei uh hi, bang hang hiam cih leh
amaute in a omna zong kha lo uh hi, hih lungnopna pen lungsim takpi
tawh Christu a sangte bekin ngah uh hi.

1.      Isaiah hong genkholh a lamdang lungnopna:

- Palestine gam leh a kima om gamte mun khat leh mun khat
kilamdang mahmah hi. A tam zaw munte pen sehnel gam hi a,
lingkung a tom thelthal peuh po lel hi. Ahi zongin mun khatkhat
pen a lei hoih cih takin hoihin, tu ni ciang dong hoih lai hi. Isaiah
dam lai-in hoih zaw kaan lai ding hi. Lebanon mualah singkung lopa
dim takin po zihziah hi. Carmel mualah ahih leh· a nim dihdiah
lopate poi-in lungzuanhuai mahmah mun ahi hi. Sharon zang pen lei
hoih mahmah mun hi a, a mel hoih mahmah pakte pakna mun ahi hi.
Solomon La sungah tangvalpa in a it mahmah a lawmnu pen Sharon
pak tawh genteh hi. (Sol.2, 1).

- Leitungah in lungdamna thei lo ding hi .napi-in Isaiah in a keugaw
leitang pen lei hoih suakin pak hoihnonote hong po ding ahih manin
lei tang nangawn a lungdamna dingin sam hi.

Isaiah in thu nam thumte hangin lungdamna hong om ding hi, ci-in
tangko hi:

v  Israel mipite in koltanna gam panin inn lam zuanin hong ciahkik
ding uh hi.

v  ni khat ni ciangin mi poi mi zoi ahi, a pau thei lo, khua za
thei lo bilngongte leh mittaw khelbaite in damna hong ngah ding
uh hi.

v  gimthuakna leh dahna in ni khat ni ciangin hong bei siang
kiuhkeuh takpi ding hi.

- Pasianin Isaiah tungtawnin hih a lamdang mahmah lungnopna hong
piak ding hong kiciamna pen hong tangtungsak khin ahi hiam?

Pasian hong kamciamna pen a beisa hun in pawl khat tangtung khin
a, tu hun ciangin zong hong tuntunna om in, ni khat ni ciangin a kicing
takin hong tangtung siang ding hi. Bangci bangin hong tangtung ding
cih en dih ni:

2.      Koltanna panin Israel mite hong ciahkikna:

- Jerusalem khuapi a kisiat ciangin Judah mite sila dingin kimanin,

kum tampi sung koltanna thuak uh hi. Mi dangte' gam sungah kum

tampi sung a am khit uh ciangin lungdam takin a tawpna-ah hong

ciahkik uh hi. Tua khit ciangin amau pianna gamah lokho uh a, a inn

ding uh lamin, a kisusia a biakinnpi uh zong lam thak uh a, Salan late

sa-in Pasian biakik thei uh ahih manin bangzah takin lungdam uh ahi

hiam, cih pen i ngaihsun thei hi.

Isaiah hong thugenna pen hong tangtung hi:

"Topa' hotkhiatsa mite hong ciahkikin
lungdam tawntungna mai pua-in la sa kawmin
Jerusalem ah hong tung ding uh hi. (Is.35,10)

Ahi zongin Isaiah' thugente amau khangin a tangtung lo pawl khat
om hi:

"Amaute in lungdamna leh
kipakna ngah ding uh a,

dahna leh khuisatna om nawn lo ding hi." (Is. 35,10)

Zawnna leh natna hangin hong ciahkik Israel mite' lungnopna hong
kiamkik hi. Hong ciahkik khit uh ciangin amaute in nakpi takin a

lungkia uh hi, ci-in tangthu sungah i sim hi. Pasian in ama hong

kiciamna hong ciampel ahi hiam?

3.      Isaiah' thugenkholhna hong tangtunna a dawl riihna:

- Isaiah in a lungdamna dingun a thupi penpen thu hih bangin hong

gen hi:

"Pasian hong pai ding a,

note hong honkhia ding hi." (Is. 35,4)

- Isaiah hong thugenkholhte lakah a thupi penpen in Messiah Tapa
hong pai ciangin hong tangtung hi. Messiah pen a min "Jesu" kici a,
a khiatna in "Hong Gumpa" a cihna ahi hi.

a)    Lungdamna Lai Siangtho sungah Jesu in pumpi natna a

tuamtuamte a damsakna hong gen hi:

v  mittawte in khua mukik thei uh hi. (Mt. 9, 27-31) (In. 9,1-41)

v  bilngongte in khua za thei-in, a pau theilote pau theikik
hi. (Mk. 7, 31-37)

v  khebaite pai thei hi. (Mt. 9, 1 ~8; Sawl. 3, 1-10)

Hih Lungdamna Lai Siangtho sung a kigen natna panin Jesu in a
damsak na lamdangte pen a vekpi-in kigeJh khin lo a, tampi lakah
tawmtawm bek a kigelh ahi hi. Matthew' Lungdamna Lai Siangtho
sungah hih bangin i mu hi: Ama kiangah mihon tampi tak hong pai
uh a, khebaite, khezawte, mittawte, a pau thei lote leh cina dang tampi,
Jesu kiangah a hong koih uh hi. Jesu in tuate khempeuh a damsak hi."
(Mt. 15, 30)

b)    Jesu in pumpi natna a damsakna pen leitungah hong om lai-a
kha natna a damsaknate' lim a lak ahi lel hi. Hih kha natna tawh
kisai na pen leitungah a om lai a kipan tu ni ciang dong hong sem
a, eite mit muh mahmahin hong piang thu ahi hi:

v  Kum tampi sung kha tawh kisai nate mu thei loin, mittaw
bangin a om mite in Pasian' itna hong mu thei-in amaute
adingin Pasian' vaihawmna hong mukhia uh hi.

v  A nuntak sung khempeuh uh dawi mangpa' thu bek ngai-in a
bilngong tawh kibang mite in Pasian' Kammal leh Kha
Siangtho' aw hong za uh a, hong thei uh hi.

v  Mawhna hangin khebai, khezaw tawh kibangin a lumcip mite
in tu-in vantung gam lam zuanin hong pai uh hi.

v  Kha lam tawh kisai-in a pau thei lo mite in tu in hong pau
thei-in, Pasian phatin, thungenin ama hong .itna mi dangte
kiangah a tangko uh hi.

Tu mahmah in ei Christian thuzui mite in Pasian in eite hong itna i
mu thei a, ama Karnmalte i ngai thei a, thu i nget ciangin amah tawh
a kiho ihia, vantung gam lam zuanin a paipai mite ihi hi.

Kamsangpa Isaiah hongthugenkholhna pen tu mahmahin eite sungah
hong tangtung den ahi hi; Pasian hong pai khinin eite hong gup laitak
ahi hi.

- I lungnopna a liat mahmah hangin kicing nai lo hi. Eite in pumpi leh

kha natna tuamtuamte i nei thei lai hi. Lungkham sinkham i thuak

loh ni cihbang om nai lo hi. Pasian in Isaiah tungtawn a hong kiciam
lungnopna a kicing takin i ngah nai kei hi.

4. Tuiphum John pen eite etteh ding ahi hi:

- Tu ni Lungdamna Lai Siangtho in i nuntak hun sung a hong piang

tawntung dahna leh lungnopnate i theihna dingin leh Pasian hong

kiciam lungnopna kicing i ngah dong i ngak theihna dingin a kisam

thakhauhna hong pia hi.

a)    John in Topa Jesu thu thuman takin tangko-in mite Pasian lamah
hong kiheina thu lungdam takin a mu hi. Tua bek hi loin Jesu a
tuiphum lai takin Pasian hong gen kammal zong a za hi:

"Hihpa pen ka it mahmah ka Tapa hi a,

ama tungah ka lungkim mahmah hi." (Mt. 3, 17)

b)    Na sep ding a ama tunga a kipia a zawh ciangin lungdam takin
sih ding bek ngaihsun ta-in, amah in thuman takin a nasepna
thaman ngah ding bek lamen ta hi.

- Tua tawh kicing nai lo lai-in Herod kumpipa in amah thong

sungah khum hi. Tua hun lai a thong kiatna pen nuam lo phadeuh hi.

c)    Hihte khempeuh sangin asia zaw hong pai lai hi. John in thong
sungah a om lai takin gimna nakpi takin thuakin lungzuang takin
a om lai takin kimuanmawhna lungsim a tuamtuam hong nei hi.
Kha Siangtho lam lahna tawh amahmah in a tangko thu, gah hoih
a gah lo sing khempeuh kiphukin mei khuk sungah kikhul ding hi;
ansite a mit ngei lo mei sungah ding hi, ci-a a gen. thu a
tangtunsakna dingin bang hangin Jesu zekai ahi hiam; bang
dingin Herod tawh a kibang mi gilote dan kipia pahpah lo ahi
hiam, ci-in a lunghimawh mahmah hi. (Mt. 3, 10. 12)

- Amah in a sepna leh a bawlnate, a tangkonate a khial kha ding hiam,
ci-in amah leh amah kimuangrnawh hi. A tawpna-ah Jesu pen
Messiah hong hi kha kei mawk leh ama nuntakna leh a gimthuaknate
a mawkna hong suak mawk ding hi, ci-in John in ama om muan
munin ngaihsun hi.

- Lungdamna Lai Siangtho sungah hih bangin hong gen hi:

"Tuiphumpa John in thong sungpanin Jesu' nasepnate
a zak ciangin Jesu kiangah a nungzuite sawl a,
'Nangpen a hong pai dingpa na hi hiam?

Tua ahih kei leh a dang na lamen lai ding

ka hi uh hiam, ci-in a dongsak hi." (Mt. 11, 2-3)

Jesu in John kiangah hih bangin a lunghihmawhnate gen siang

    pah hi:

"Va ciahkik un la, tu-a na zakte uh leh

na muh uh thute va gen un:

Mittawte in khua mukik a,

khebaite pai theikikin, mi phakte damkik a,
bilngongte in khua zakikin, mi site hingkik a,
mi zawngte tungah Lungdamna thu

a kihilhnate va gen un.

Kei hong umte pen a lungdamhuai
mahmah ahi hi." (Mt. 11, 4-5)

- Hih bangin Jesu in John a gen nuam ahi hi: John aw, bangmah
peuhmah lunghimawh kei in la, muanmawhna lungsim peuhmah nei
kei in. Kamsangte gen khempeuh kei tungah hong tung ta hi. Na
nasepna a mawkna hilo hi. Kei sungah upna hong nei in. A sawt vei
loin na lungdamna hong kicing ding hi.

- Jesu in John' sawltakte thu a vaikhak bek tawh lungkim nai lo lai-in

ama sunga a lungnopna leh a kihehnepna pen John hawm lai hi.

- John' sawltakte a ciah khit ciangin Jesu in mihonpite zakin John

phat gawp hi. John in ahih leh Jesu' phatnate za thei nawn lo hi. Ahi

zongin tuate a zak ding zong ama adingin kisam lo hi. Thong sungah

hamsatna tampi a thuak hangin Jesu piak lungnopna in a sih dongin
amah hehnem hi.

- John' tangthu leh eite' tangthu zong a kibang ahi hi. Eite zong
Christian thuzui i suah ciangin nakpi takin i lung a dam a, tua i
lungdamna pen a bei thei ngei lo dingin i ngaihsun hi.

Tua ciangin a sawt loin hamsatna tuamtuam, natna satna, simmawh
bawlsiatna i thuak hi. I gitnat lohnate hong suakkikin mawhna
sungah i kiakik hi. I upnate leh i biakna mahmah zong i um taktak
nawn pha kei hi. Vantung gam cih khawng, Hell gam cih khawng urn
se loin ka lawmte mah bangin om lel leng a hoih zaw kha kei tam,
ci-in i ngaihsun thei hi. A tawpna-ah vantung gam cih leh Hell i cihte
a om lopi khawng na hi mawk leh kilaisup ding hi, cih bangin i
ngaihsun thei hi. Hih thute a thei lo mite zong leitungah nuam sa
mahmah lel uh hi, cih bangin i lungsim sungah ze-etna tuamtuam i
ngah thei hi.

- Hih bangin lungsim buaina i thuak khak ciangin John mah bangin
Jesu kiangah thu dot ding hi napi-in eite in tua thudot ding pen i

mangngilh pahpah hi. Thungetna tawh Jesu kiangah thu i dot ding i

mangngilh zelzel hi. Hih bangin thungenin Jesu dong, lehang,

kilemna leh lungdamna i ngahkik ding hi.

Thu i ngetna hangin i hamsatna khempeuh hong bei pah sam lo ding
a, sum i deih zahzah zong i ngah pah tuan kei ding hi. Ahi zongin
dahna lungkhamna, simmawh bawlsiatnate i thuak lai veve ding a,
tuate kawmkalah hong hehnem dingin Jesu Christu bek in hong piak
theih lungnopna leh kilemna i ngah ding hi.

5.    Isaiah hong genkholh thute a tawpna-ah a kieing ~kin hong

     tangtung ding hi:                                                        /

- Isaiah hong genkholh thute pen ei nuntak sung mahmahin dam takin

hong tangtung toto a, i sih ciangin hong kicing taktak ding hi.

Hamsatna gimna khempeuh thuak ta lehang i thuman paisuak zawh

a, John mah bangin a tawp dong i thuak zawh leh i sih ciangin Isaiah

genkholh lungnopna a kicing takin i ngah ding hi.

Maangrnuhna Lai Siangtho sungah hih bangin i sim hi:

''Amaute' mit panin khitui khempeuh nulsak ding hi;

thului sate maimang khin ta ahih manin sihna dahna leh

na sa-a kahna cihte om nawn lo ding hi." (Mang. 21, 4)

- Hamsatna i thuak hangin Pasian in hong piak ding a hong kiciam
lungnopnate a banbanin hong pia ahih manin ama sungah i upna i
thanem sakna ding thu om lo hi.

Tu ni Lai Siangtho nihna sungah James in Topa hong paikik ciangin

i ngah ding lungnopna pen bangci ngak ding ihi hiam, cih hong hilh
hi: "Note zong na lungduai un. Topa hong pai ding hun nai ta ahih
ciangin na lungsim uh thahatsak un." (Jas. 5, 8)

Christian thuzui khat nuntakna in hih leitungah dahna leh
lungkhamna tawh a kihei lungnopna man taktak i ngah a, hih
lungnopna pen i sih ciangin hong kicing pan ding hi.

Ahi zongin Christu a nial mite' nuntakna in ei Christian thuzuite aa
mah tawh kibang hi. Ei mah bangin gimna tawlna lungkham
sinkhamnate thuak uh a, tua banin a man taktak ahi lo leitung
lungdamnate zong ngah uh hi. A sih uh ciangin a bei ngei lo dahna, a
kicing dahna ngah ding uh hi.

Tua ahih manin koi zaw nuntakna teel ding ihi hiam, Christian
nuntakna maw, ahih kei leh Christian thuzui ahi lote' nuntakna maw,
khat zawzaw i teel kul hi. Khat peuhpeuh i teel ahi zongin khat
vei bek teel tawh kicing lo hi. Ni simin i teelna pen i thaksak
kul ding hi.

Thukhupna:

1.    Mihingte in a tawntungin lungnopna a zong tawntung uh hi;
Messiah Topa bekin lungnopna man taktak hong pia thei
hi.

2.    Isaiah hong genkholh lungnopna pen Israel mite koltanna panin
hong ciahkik uh ciangin pawl khat hong tangtung suak a, ahi
zongin a vekpi-in hong tangtung kim lo hi.

3.    Isaiah hong genkholh thute lakah a thupi penpen thu in
Christu leitungah hong pian ciangin hong tangtung hi. Tua
hun a kipan Christu a sang mi khempeuh tungah hong
tangtung hi.

4.    Hih leitungah i nuntak lai teng i lungdamna pen kicing thei ngei
lo ding hi; ahi zongin Christu tungah i thuman tak ciangin leh
thuman takin amah i zuih ciangin:

v   i lungdamna pen dahna in zo thei lo hi.

v   i dahna mahmah zong lungnopna hong suak ding hi.

5.    Christu sungah i sih ciangin i lungnopna hong kicing pan ding hi.

Isaiah hong genkholh lungnopna pen eite khat ciat sungah hong
kicing ding hi.

Jesu Christu tungah phatna om ta hen.

Mipi' Thungetna:

Makaipa:

A tate lungnopna ding bek a ngaihsun i Pa Pasian tungah thungen ciat ni :

1.  A lian bel Siampipa, i Siadawpa, phungyite, nungak siangtho, tangval
siangthote leh thuhilh siate in John in Christu thu a tangko ciangin
lungnopna a ngah mah bangin, Lungdamna Thu a tangkona uh-ah
lungnopna a ngah theihnadingun, Topa tungah thungen ciat ni:

Mipi : Topa aw, ka thungetna uh hong ngai tan.

  2. Eikhua sung thuzuite in i upna hangin i ngah lungnopna leh thahatna tawh i
sanggam lawkite tungah Lungdamna Thu i tangko theihna dingin, Topa
tungah thungen ciat ni:

Mipi : Topa aw, ka thungetna uh hong ngai tan.

3.  Eite khat ciat in i lungnopna leh kilemna hong susia thei mawhna panin a
tawntungin i kikep theihna dingin, Topa tungah thungen ciat ni:

Mipi: Topa aw, ka thungetna uh hong ngai tan.

4.  Thuzui a suah lai taka a ngah uh lungnopna a man suah Christian thuzuite in
thuman takin Christu zuihna bek tawh a mansuahsa uh lungnopna a ngahkik
thei ding uh hi, cih a theihna dingun, Topa tungah thungen ciat ni:

Mipi: Topa aw, ka thungetna uh hong ngai tan.

5.  Mi khempeuh in pumpi leh kha natna panin Christu bek in damsakna pia
thei-in, amah bekin a man taktak lungnopna mihingte tungah pia thei hi, cih
a theihna dingun, Topa tungah thungen ciat ni:

Mipi: Tapa aw, ka thungetna uh hong ngai tan.

Vantung a om Pa aw, mihingte kiangah a man taktak lungnopna a puak
dingin Christu Jesu, na Tapa nong sawl manin ka lung uh a dam hi;
vantung gamah lungnopna khempeuh kipatna ahi, nangma kiang kong tun
matengun gimna hamsatnate ka thuakna uh-ah lungkia loin thu ka nget theih
denna dingun hong huh ta in, ci-in kote' Topa Christu suangin kong ngen uh hi.
-Amen.

Letsong Vanpiakte Tungah Thungetna:

Pa aw,

Up na leh itna tawh hih letsongte kong pia uh hi:
ka nuntakna mahmah uh nang tunga kong piak
uh lungdam thuhna leh ni simin kong piak

uh letsong hong hisak ta in, ci-in

kote' Topa Christu suangin kong ngen uh hi. - Amen.

Pa Pasian Phatna La:

Pa aw, nangmah in vangliatna khempeuh tawh a kicing,
a nungta tawntung Pasian na hi a,

a tawntungin mun khempeuhah
kote' Topa Jesu Christu suangin

na tungah lungdam kong thuh ding uh
a kilawm mahmah ahi hi.

Kamsangte khempeuh in ama hong paina ding
na genkhol uh a, a kigen thei lo 'itna tawh

a nu Siangtho Maria in ama sungah na suaksak hi.
Amah hong pai takpi ciangin Tuiphumpa John in
ama hong paina thu na tangko hi.

Amah hong pai ciangin thungetna tawh ka ngak
gige laitak uh hong tuahna dingin leh ka lungsim

sung uh-ah lamdangsakna leh phatna ka neih theihna dingun
ama suahna pawi bawl dingin ka kithawi uh hi.

Hih bangin ka kithawina uh-ah amah in itna tawh kote
sungah lungnopna hong guan hi.

Vantung a om vantung mi khempeuh tawh a kibangin
na minthanna phatin, amaute tawh

nangmah pahtawina la kong sa khawm uh hi:

Vanglian Topa Pasian in siangtho hi, siangtho hi, siangtho hi....

Siangtho Pumpi La :
A 1ungkham mite tungah:
thahat un la, lau kei un;

eite' Pasian in note a hong gum dingin
hong pai ding hi, ci un.

Siangtho Pumpi San Khit Thungetna:

Pa aw,

tu a ka san uh Siangtho Pumpi in

mawhna panin kote hong honkhia ta hen la,

hong Gumpa suahna pawi ka bawl theihna dingun hong
kigingsak ta hen, amah in a tawntungin Topa ahi hi. – Amen.