A.4 - ADVENTU NIPI LINA

A-4. ADVENTU NIPI LINA

Sungtum La:

Meiite in Thumanpa guah bangin hong zusak hen la
leitungin hong Gumpa hong suakkhiasak ta hen.

Kipat Thungetna:

Adventu Hun hong bei mah bangin i lungsim sungah
Christu hong pai takpina dingin thungen ciat ni:

Vantung a om Pa aw,

nangma itna kote' lungsim sungah hong kidimsak in:
na Tapa mihing bangin hong pianna ding thu vantung

mi tungtawnin nong theisak hi: ama gimthuakna leh a sihna hangin,

a thawhkikna tawh hong thalawhsaksa minthanna-ah hong tungsak ta in.
Amah in nang leh Kha Siangtho tawh

Pasian khat suakin a tawntungin nungta-in a uk hi. - Amen.

Lai Siangtho Masa:

Isaiah Lai Siangtho sung pan simna ahi hi: (Is. 7, 10-14)
Topa in Ahaz kiangah thugenkik a,

"Topa na Pasian kiang panin lim khat ngen in la,
a thuk leinuai panin ahi zongin,

a sang vantung panin ahi zongin ngen in," a ci hi.

Ahih hangin Ahaz in, "Ka ngen kei ding hi;
Topa ka ze-et kei ding hi." a ci hi.

Tua ciangin Isaiah in, "David' innkuan aw ngai un!
Mite na lunggimsakna uh kicing sa zo lo a,

ka Pasian zong lunggimsak lai na hi uh hiam?

Tua ahih ciangin Topa mahmah in note tungah
lim khat hong pia ding hi.

En un, nungak khat gai-in tapa khat nei ding a,
ama rnin Immanuel kici ding hi.

Hili in Pasian' Kammal ahi hi.

Salan La Kidawnna: (La. 24,1-6)

1. Leitung leh a tunga omte,

leitung leh a tunga teengte Topa aa ahi hi.
Bang hang hiam cih leh amah in tuipite sungah
a bul phut a, tui tungah a kipsak hi.

Dawng tawina:

MinthangKumpipa tumsak un.

2. Topa mual tungah kuate kahto ding ahi hiam?

Ama mun siangtho-ah kuate ding ding ahi hiam?
Khut siangtho leh lungsim siangtho a nei mi,

a man lo-ah a nuntakna pia loin,

khemna tawh a kiciam lo mite ahi hi. (D.)

3. Amah in Topa tung panin thupha ngah ding a,
amah a honkhia Pasian kiang panin

diksakna a ngah ding hi.

Tua bang mite pen amah a zong,

Jacob' Pasian' mai a zongminam ahi hi. (D.)

Lai Siangtho Nihna:

Rome Christian thuzuite tunga Paul' laikhak
sung pan simna ahi hi: (Rom. 1, 1-7)

Pasian kiang panin a hong pai,

Lungdamna Thu a hilh dingin Pasian' teelna tawh .
sawltak ahi, Jesu Christu' nasem keimah Paul in

lai ka hong khak hi.

Pasian in kamsangte tungtawnin hih Lungdamna thu a gensa hi a,
, Lai Siangtho sungah a omsa thu ahi hi.

Tua thu pen eite' Topa Jesu Christu ahi, ama Tapa' thu ahi hi.
Tua Tapa pen leitung ci-le-sa lam panin David' suan hi a,

Kha Siangtho thu lamsangah ci lehang sihna

panin vangliatna tawh a thawhsakkikna hangin

Pasian' Tapa ahihna thu Pasian in a kilangsak hi.

Minam khempeuh in ama thu umin a zuih theihna dingun
Christu hangin sawltak nasep sep theihna ding hamphatna thu
Pasian in Christu' nasepna dingin kei a hong pia hi.

Pasian' sapna za-in Jesu Christu tawh a kipawl Rome khua-a

a om note khempeuh zong tua minamte sungah a kihel na hi uh hi.
Tua ahih manin Pasian in hong it a, ama mi dingin a hong sap,

no Rome khua-a a om Christiante khempeuh tungah lai a hongkhak ka hi hi.

I Pa Pasian leh i Topa Jesu Christu in note tungah

hehpihna leh nopsakna thupha hong tungsak ta hen.

Hih in Pasian' Kammal ahi hi.

Alleluia: (Mt. 1, 23)
Alleluia, alleluia!

Nungak khat in gai-in tapa khat nei ding a,

a min dingin Emmanuel kiphuak ding hi.
Emmanuel a khiatna in eite tawh Pasian
hong om khawm hi, a cihna ahi hi.

Lungdamna Lai Siangtho:

Matthew gelh Lungdamna Lai Siangtho sung pan
simna ahi hi: (Mt. 1, 18-25)

Jesu Christu hong suahnazia in hih bang ahi hi.
Maria pen Joseph adingin a kidong sa hi a,

ahi zongin a kiten.taktak ma-un Kha Siangtho in
amah a gaisakna thu Maria in a thei hi.

A lawmpa Joseph pen a manin a gamta nuam

mi khat ahih manin a lawmnu maizumsak nuam lo a,
kuama theih lohin sim nusiat dingin a ngaihsun hi.

Ahi zongin hih bangin thu a ngaihsut lai takin

a mang sungah Tapa' vantung mikhat hong kilang a,
"David' suan Joseph aw, Maria sung a nau pen

Kha Siangtho in a gaisak ahih manin amah tenpih ngam lah ken.

Amah in tapa- khat hong nei ding a,

tua tapa-in ama mite a mawhna uh panin
honkhia ding ahih manin ama min dingin
Jesu na phuak ding hi," ci-in thu a gen hi.

Topa in.kamsangpa tungtawnin a gensa thu
a tun theihna dingin hih thute a piang ahi hi.

Tua a genna-ah,"Nungak khat gai-in tapa khat nei ding a,
a min dingin Emmanuel kiphuak ding hi" ci hi.

Emmanuel a khiatna in eite tawh

Pasian hong om khawm hi, a cihna ahi hi.

Joseph zong a khanlawh ciangih Topa' vantung mi sawl bangin a zi a la hi.
Ahi zorigin tua tapa a suah hun dongin luppih lo a,

a suah ciangin a min dingin Jesu a phuak hi.

Hih in Topa' Lungdamna Lai Siangtho ahi hi.

HILHCIANNA:

Kong it thuzui ute naute aw;

- Lungdambawl hun a hong tung hi ta hi. Nung Nipi thum sung teng
Pawlpi in:

v  hong pai ding hong Gumpa i theih semsemna dingin hong huh hi.

v  amah in eite sungah gupkhiatna .hong piak theihna dingin i

lungsim hong.kigingsak hi.

- Tu ni a kisim Lai Siangthote tungtawnin Pawlpi in Jesu suah
Lungdambawl pawi i kiginna khempeuh i hial bawlna dingin hong
hilh hi:

v  eite in hong Gumpa pen Maria leh Joseph mah bangin i sang
ding a, amah in a deih bangbangin eite hong zat theihna dingin i
ki-ap ding hi.

v  i nuntak hun sung khempeuhin hong Gumpa i theihna i khansak
theih semsemna dingin i hanciam ding hi. Amah in mihing lah
hi-in Pasian lah ahi hi. Tua ahih manin cik mah hunin amah i thei
lua ngei kei ding hi.

1.      Kumpipa Abaz in Pasian in amah a gup ding nial hi:

, .

- Lai Siangtho masa sunga Kumpipa Ahaz' tangthu sung panin i sin
ding thupi mahmah khat om hi. Eite in mihingte' thahatna muangin,
Pasian i muan kei leh gupkhiatna i ngah kei ding a, Lungdambawl
Jesu suahna in zong eite adingin bangmah kimanna nei lo ding hi.

- Ahaz' khialhna bang ahi hiam, cih en dih ni:

Adventu Nipi Nihna sung a i sim mah bangin Solomon kumpipa a
sih ciangin a gam khen nihin kikhen hi. Minam sawmte in sak lam
gam ahi, "Israel Gam" ah kigawmin Samaria pen khuapi in a nei uh
hi. A dang minam nihte in khang lam gam ahi, "Judah Gam"
phuanin tua gamah kigawm uh hi. Khang lam gamte in Jerusalem
pen khuapi-in nei uh hi. ,

- Ahaz pen Judah mite' kumpipa ahi hi. Amah in Jesu hong suah ma
kum 750 hun khawngin kumpi a na sem ahi hi. Amah pen a gilo
mahmah kumpi khat ahi hi. Lawki milim bia minam ahi, Jezebel a
kici numei khat zi dingin hong nei zenzen a, a zi makaihna leh
hanthotna tawh Israel mite milim biasak hi.

- Bangzah takin Ahaz a gitloh hangin Jerusalem khuapi a siat kuan
\ hunin Pasian in Ahaz a huh dingin hong pai hi. A tangthu' piandan

pen hih bang ahi hi :

Israel kumpipa in Damascus kumpipa tawh kipawlin Ahaz do hi.
Hih galkap kipawl khawmte hong pai sukin Jerusalem khuapi a la
dingin hong kipan uh hi.

- Ahaz leh a gam mite lau thei mahmah uh hi:

"Huih in gamlak a singte a mut bangin

amah leh a mihingte' lungsim kiliing hi." (Is. 7,2)

Topa in kamsangpa Isaiah pen Ahaz kiangah thugen dingin sawl hi.
Isaiah in hih bangin gen hi: kumpipa aw, bangmah lau ke'n la,

kuama huhna zong ngen se ken. Pasian kiangah muanna nei lecin
amah in nangmah leh na mite hong hon ding hi. A sawt loin tu lai
takin nang hong do kumpite pen a omna lam zong kithei loin
mangthang ding hi: tua gam nihte kisusia mang ding hi.

Ahi zongin Topa in Ahaz tungah a thupi mahmah thu khat
theikholsak hi:

"Hih thu upna kho na neih kei leh, nang na kip kei ding hi." (Is. 7, 9)

- Ahaz in Topa' thupiak mang lo hi. Pasian tungah muanna a neih
sangsikin, ama pilna muang zawin Assyria kumpipa' huhna a ngahna
dingin a sawltakte paisak hi.

Lungnemna takpi tawh Ahaz kiangah Topa in Isaiah khat vei
paisakkik hi. Isaiah in ama thu puak pen Pasian kiang panin hong
pai taktak hi, cih a lah theihna dingin na lam dang a bawlna ding
nangawnin gen'hi, Kumpipa in na khat peuhpeuh ngen leh bangzah
takin a lamdang ahih hangin Pasian' vangliatna tawh a sepna dingin
Isaiah in gen hi. Tua bangin na lamdang a bawlna tawh amah pen
Pasian' sawltak ahihna thu lak ding hi.

- Ahaz in Lai Siangtho Kammal zangin,

"Topa ka ze-et kei ding hi," ci hi. (Deut. 6, 16)

Ahaz in hih bangin a gen ciangin Pasian a zahtakna tawh a gen hi
peuhmah lo hi. Hih pen Pasian a zahpihna hi zaw hi. A gen nopna
pen hih bang ahi zaw hi:

Topa in a ut peuhpeuh sem hen la, nang kamsangpa zong na sep ding

 peuh sem lel in. Hong nawngkaisak kei zaw in. Ke'n sep ding a ka

geelsa bangin ka sem lel ding hi. Pasian zong ka muang kei a, ama

geel sangin a hoih zaw nate ka geel khin zo hi. (Assyria kumpipa tawh

kiciamna na bawl zo uh hi).

2.      Isaiah' genkholhna:

- Pasian' huhna kumpipa in sang nuam lo ahih manin Isaiah heh in hih
bangin kumpipa tungah dawng hi. Isaiah in kumpipa a hopihkikna
pen tu ni Lai Siangtho sungah tawrn bek hong kigelh hi. A cian lai
teng a tomin hih bangin i tom lak thei hi:

a)    Nangmah in Pasian hong kiciam huhna deih loin, nangma pilna
leh leitung kumpite' huhna na muang hi. A sawt loin nang hong
do gamte kisia mang ding a, nang gam zong kisia ding hi.

b)   Pasian in nang leh na mipihte hong gup nopna hong lahna dingin
hong lah limte na um kei hi.

Ahi zongin Topa in lim khat hong pia veve ding hi. Hih lim in
nang leh na kumpi gam neuno khat gupkhiatna ding bek hi loin
mi khempeuh hong gupkhiatna ding lim khat hi ding hi.

Hih in tua lim ahi hi:

"En un, nungak khat gai-in tapa khat nei ding a,
ama min Immanuel kici ding hi." (Is. 7, 14)

-Hih Isaiah' thugenkholhna pen Lai Siangtho Lui hun sung
mahmah in zong ni khat ni ciangin Messiah hong pai ding hi,
a cihna hi, ci-in ki ciamteh hi. Tu ni Lungdamna Lai Siangtho
sungah zong Matthew in hih Lai Siangtho Lui sunga Isaiah
gelhna na man hi. (Mt. 1, 23)

Bang hangin kuamah in a khiatna a theih het loh hun, kum za sagih
bang khit ciangin a piang ding thu pen Pasian in hong genkhol ahi
hiam, ci-in i lungmang thei kha ding hi.

Peter in a thuzuitetunga a khak lai i phawk kha ding hi:

"Topa adingin ni khat leh kum tul khat,

kum tul khat leh ni khat a kilamdan luatna om lo hi." (2 Pet. 3, 8)

Pasian adingin a beisa, tu hun leh mai lam hun cih bang om tuan loin
kibang khin lel hi. Na khempeuh pen tu ni hi khin lel hi. A geelsa na
khat peuhpeuh a sepna dingin hun tom lua cih bang om thei lo hi.
Tua mah bangin hong kiciamna khat peuhpeuh zong a tangtunna
dingin hun sawt lua cih bang zong om thei lo hi. A piang khempeuh
hoih bek a sak hun lian a piang ahi hi.

Ahaz' gamtatna panin i sin ding thu khat om a tua in: Amah in
Pasian muang hi leh amah leh a mite in gupna ngah ding uh hi. Ama
thuak ze-etna in eite thuak ze-etna tawh a kibang hi. Eite in ei leh ei
i kimuan a, sum leh pai leh leitung nate tungah muanna i neih lai
teng Pasian tungah muanna a nei lo ihi hi. Eite in hong Gumpa pen
kiniamkhiat takin i sang ding a, ama hong itna sung bekah muanna
nei-in amah bek bekin eite hong honkhia thei hi, cih kip takin i um

ding hi.

3.      Maria leh Joseph,in hongGumpa pen a manin a sang uh hi:

- Lungdamna Lai Siangtho in tampi hilhcianna kisam lo hi: Maria
leh Joseph in Jesu bangci san ding cih lampi hong lak hi.

a) Mary:                                                 /

- Amah in a gitnat lohnate thei-in, amah leh a neih na khempeuh in
Pasian piak letsong hi, ci-in thei hi.

Pasian in a deihna ama tungah a gen ciangin kipumpiakin "Na
gensa man bangin keima tungah hong piang ta hen," ci hi.
(Lk.l,38).

- Ama kiniamkhiatna leh Pasian' deihna a sep nopna hangin leitungah
hong Gumpa hong suakin mihingte leh Pasian kikalah kilemnahong
piang hi.

Khua khat leh khua khat a kitot uh ciangin a kilemkik theihna
dingun a kitawng khuate a hilo, mun dang khatah kilepna mun
bawlin tua lai-ah kilem thei pan hi. Mawhna hangin mihingte in
Pasian' galte hong suak hi. Tonu Maria pen kilepna mun hong
suakin tua lai-ah Pasian in mihing tawh kimuh khopna hong bawl hi.
Pasian in Maria sungah mihing bangin hong piangin amah in Maria'
si leh sa sung panin ama si leh sa ding hong tawmin mihingin hong
piangkhia hi.

- Maria in Pasian tungah upna leh muanna nei ahih manin i
phat dingin kilawm hi. Bangci phat ding cih Elizabeth in hong

hilh hi:

"Topa in nang tungah a hong gen thute
hong tung taktak ding hi, ci-a na upna pen

nang adingin a lungdamhuai mahmah ahi hi." (Lk. 1, 45)

Lungdambawl hunin Jesu bangci san ding ihi hiam, cih Maria in lim
hong lak hi. Eite in nu Maria mah bangin i gitnat lohnate i kithei
ding a, Pasian in eite hong itna sungah muanna i nei ding hi.

b) Joseph:

- Lungdarnna Lai Siangtho sungah Joseph pen "a manin a gamta
nuam mi khat" ahi hi, ci-inhong gen hi. (Mt. 1, 19).

Judah mite' ngeina mah bangin mi khat ading a kidong sa nungak in
a kiteng khin sa mah bangin kingaihsun hi. Amah in a lawmpa
tungah a thuman kei leh suang tawh den lup ding dan kipia ding hi.
(Thkna. 22, 20-21)

Joseph in Maria a gaina thu a theih ciangin lamdang sa mahmah hi.
Ahi zongin amah in Maria itin ngai-in, nakpi .takin muang ahih
manin a gaina pen ama mawhna hang hilo ding hi, cih thei hi. A
lungkiamahmah ahih manin taimang sawm hi.

Pasian in a mang sungah vantung mi zangin amah-hong suaktasak hi.
Joseph in vantung mi thugen umin,'Pasiah' muangin Maria a zi

dingin la pah hi. Joseph zong Maria mah bangin Pasian' khut sungah

kipumpiak vilvel hi.     .

- Ahaz inPasian' vaihawmnate nialin Pasian' thupiak thudon lo ahih
manin amah leh a gambuppi-in thuaklawh uh hi.

Maria leh Joseph in ahih leh Pasian' thupiakna leh amaitna sungah
muanna nei uh ahih manin amaute leh leitung buppi-in gupkhiatna
ngahlawh hi.

4.      Jesu in Pasian' tapa hi-in, mihing' tapa zong hi, cih i thei ding hi:

- Tu ni a .i sim Lai Siangtho nihna in Rome. Christian thuzuite tunga
Paul' laikhak sung panin a kipatna teng i sim hi. Paul in amaute
tungah Jesu in Pasian zong hi-in Mihing zong ahi hi, Pasian"tapa
zong hi-in, David'tapa zong ahi hi, cih thu a hilh nuam ahi hi.

- Paul in Rome thuzuite kiangah a sansa uh upna thute a genkik
mawkmawk ahi kei hi. Ama ngimna in Christian thuzuite khempeuh
in hong Gumpa Jesu' nuntakna leh amah kua ahi hiam, cih i
lungngaih zelzel ding a deih ahi hi.

v  Jesu in Pasian ahi hi: Tua ahih manin amah in eite hong gupna
dingin vanglian hi. Tua bek hi loin amah in mi khempeuh hong
gupna dingin a tawntungin nasem hi.

v  Jesu in mihing ahi hi: amah in eite mah tawh kibang linlian hi; i

kilamdanna khat om a, amah in mawhna nei lo hi.

Hih in thu neu hilo hi. Maria in a sanggamnu Elizabeth kiangah a
hawh ciangin Elizabeth in a Topa' nu a zin do dingin a kilawm lohna
thu gen hi. (Lk. 1, 43).

Lungdambawl hun ciangin a nu leh a tapa in eite innah hong hawh
ding ahih ciangin amaute a zin do dingin i kilawm lohna i kithei ding
a, eite adingin a hamphathuai leh a lungdamhuai mahmah ahihna
zong i thei ding hi

I kilawm kei hi, i cih ciangin amaute hong hawhna dingin eite in
bangmah kilawmna nei lo hi hang. Lungdamhuai hi, i cih ciangin
Jesu in eite mah bangin mihing ahih ciangin eite thuak teng mah
thuakin, i dahna; i nuamna leh -i thuak a ze-etnate zong a vekpi-in
hong theihpih ahih manin lungdam ding a thupi mahmah ahi hi.

Thukhupna:

1.    Lungdambawl hunin hong Gumpa hong pai ding ahi hi; eite in
ama hong paina a picin theihna dingin i hanciam ding hi.

2.    Ahaz in amah a gum dingin a hong pai Pasian nial hi. Ahi zongin
Maria leh Joseph in hong Gumpa sang ahih manun amaute in
gupna ngahin, amaute bek hi loin leitung mihing khempeuh in
zong gupkhiatna a ngah uh hi.

3.    Hong Gum Topa hong paina hangin thupha hehpihna tampi i
ngah theihna dingin leh i mawhnate i kithei ding hi. Maria leh
Josephte mah bangin Pasian' khut sungah i ki-ap ding hi.

4.    Hong Gumpa in Pasian lah hi-in mihing lah ahi hi; amah in
mihing hong suak Pasian ahi hi. Lungdambawl hun sungin i
lungsim sungah lungdamna leh nuamna i nei ding hi.

Lungdambawl hun sungin hih bangin thungetna i ngen ding hi: Topa
aw, nong pai manin nang tungah ka lung uh a dam hi. Kote nong
huhna ding a na vaihawmnate kong langpan lohna dingun hong
hehpih in. Tua hi leh Lungdambawl sungin ka lung uh dam ding a,
ka nuntak hun sung uh leh a tawntungin ka lungdam ding uh hi.

Jesu Christu tungah phatna om ta hen.

Mipi : Topa aw, ka thungetna uh hong ngai tan.

Mipi' Thungetna:

Makaipa:

Lungdambawl hun sunga hong pai ding a Tapa i san theihna dingin I Pa Pasian
kiangah huhna ngen ni:

1. A lian bel Siampipa, i Siadawpa, phungyite, nungak siangtho, tangval
siangthote leh thuhilh siate in amau uk sung thuzuite thangahna ding
zah khopin Pasian tungah nakpi takin muanna nei-in a sep a bawlna
uh-ah Pasian' hehpihna bek a muan theihna dingun, Topa tungah
thungen ciat ni:

Mipi: Topa aw, ka thungetna uh hong ngai tan.

2. Ei khua Christian thuzuite in khat leh khat i ki-itna hangin Lungdambawl
hun a hong pai ding i Topa' lungsim i nopsakna dingin, Topa tungah
thungen ciat ni :

Mipi : Topa aw, ka thungetna uh hong ngai tan.

3. Eite khat ciat in dahna lungkhamna leh lungkiatna i neih ciangin Topa in
eite hong itna sungah muanna i neih theihna dingin, Topa tungah thungen
ciat ni :

Mipi : Topa aw, ka thungetna uh hong ngai tall.

4. Gimna hamsatna a thuak mite in, Jesu in zong eite mah bangin mihing hong
suakin ei thuak mah bangin gimna tawlna leh hamsatnate hong thuak ding
hong teel hi, cih ngaihsunin a kihehnep theihna dingun, Topa tungah
thungen ciat ni :

Mipi : Topa aw, ka thungetna uh hong ngai tan.

5. Mi khempeuhte in kiphatsakna paaikhia-in mawh nei mite ahih lam uh
kitelin amaute a gum thei Christu kiangah hong pai theihna dingun, Topa
tungah thungen ciat ni:

Mipi : Topa aw, ka thungetna uh hong ngai tan.

Pa aw, kote hong gupna dingin na Tapa in Pasian hi napi-in mihing hong
suahna dingin hong teel hi. Amah ka theihna uh leh ka itna uh a khan
theih semsemna dingin hong huh ta in. Amah in a tawntungin a nungta
hi. - Amen.

Letsong Vanpiakte Tungah Thungetna:

Pa aw,

kote nong gupkhiatna dingin na vaihawmna leh na deihna bangin
kong ki-apna uh 1im a lak ahi, hih kong piak uh letsongte

hong sang ta in, ci-in kote' Topa Christu suangin kong ngen uh hi. - Amen.

Pa Pasian Phatna La:

Pa aw, nangmah in vangliatna khempeuh tawh a kicing,
a nungta tawntung Pasian na hi a,

a tawntungin mun khempeuhah kote' Topa Christu suangin
lungdam kong thuh ding uh a kilawm mahmah ahi hi:

Ama hong pai ding pen kamsangte in na genkhol uh a,

a nu Siangtho Maria in gen zawh loh itna tawh

a sung panin hong suaksak hi.

Tuiphumpa John zong ama kamtaipa hi-in,

a tawpna-ah amah hongpai takpina thu hong tangko hi.

Ama suahna pawi bawl dingin ka kiginkholhna uh-ah Christu in
hong itna tawh kote tungah lungnopna a kicing takin

hong pia hi, amah hong pai ciangin ka lungsim sung

uh-ah phatna leh lamdangsakna tawh kidimin,

thu ka nget laitak hong tuak ta hen.

Vantung a om vantung mite tawh na minphatna pahtawi khawmin
a bei thei lo phatna la sa-in nang kong pahtawi uh hi :

Vanglian Topa Pasian in siangtho hi, siangtho hi, siangtho hi....

Siangtho Pumpi La:

Nungak khat gai-in tapa khat nei ding a,
a min dingin Emmanuel kiphuak ding hi.

Siangtho Pumpi San Khit Thungetna:

Pa aw,

hih Siangtho Pumpi sungah Topa ka sang zo uh hi;

kote hong Gumpa' suahna pawi a kilawm takin ka bawl theihna dingun
upna leh itna hong khangsak ta in, amah in

nang tawh a tawntungin nungta-in a uk hi. - Amen.